Pages

2014/12/23

Urte amaierakoa

Euskeraz bizi nahi dut amaierako ekitaldian gimnasia ritmikako lagun txiki bik lagundu ziguten udazkeneko irabazlea aukeratzen eta orduan jakin genuen Juanpa Dieguez izan zela, 44 erantzun zuzenen artean berea izan zen 15 zenbakiduna, sariduna. Ekitaldia eta gero topaketa luzatu genuen gabonetako azkoan, lagun artean. Hona hemen zuen gustukoen berbak, bigarren galderari erantzunez:



Eta lehenengo galdera erantzuteko? Zelan esango genuke Bermeon #lotsarikgabe? Ba lotsatu barik, hori da aurtengo mezua euskaraz aritzeko.


Hirugarren galdera erantzuteko Taraskan dagoen "Baserritarrak" begiratu behar izan dugu:
Neskak ogia eskaintzen dio astoari, andreak sagarra neskari eta astoak darama aterkia. Falta izan dena Xixili da, orrazia eskuan, badakizue lamiak errekara etortzen zirela orraztera eta arrantzaleak liluratzera, edo hori da behintzat kontatu digutena.
 
Saria Arrarik Arra jokoa izan da, Bermeori buruzko jokoa eta Juanpa ez zegoen bertan lameran baina etorri zen ostiralean urte amaierako kafe bat hartzera eta orduan jaso zuen saria, Euskera Sailak emandakoa. 


Aprobetxatu genuen urteko azken argazkia ateratzeko, opor aurrekoa, bi aste barru berriro bueltan, bitartean euskaraz egin #lotsarikgabe eta ondo ondo pasa!

2014/12/10

Euskaraz bizi nahi dut

Larunbatean aukeratuko dugu udazkeneko lehiaketaren irabazlea eguerdiko ordu batean lamerako kioskoan, Euskeraz bizi nahi dut ekitaldiaren amaieran, eta aprobetxatuko dugu urteko azken topaketa egiteko, talde guztien artekoa. Horretarako eguerdian geratu gara baina egitarauan agertzen diren ekintzetan parte hartzera animatzen zaituztegu, familia osorako dira.

Euskararen Kontseiluak bultzatuta eta Bermeoko zenbait talde eragileren partaidetzarekin antolatutako ekimena da honako hau, eta helburua, izenak adierazten duen moduan, euskararen aldeko kontzientziazioa bultzatzea. Ekimen hau ez dugu Bermeon bakarrik egingo, Euskal Herri osoan hainbat herritan ere, horretan ari dira. 


Eva, Juani, David, Mikel, Marimar, Fernando eta Rami, beste milaka lagunekin batera, euskaraz bizitzera eramango dituen bidaia egiten ari dira. Zeuk ere lagundu ahal diezu, euren bidelaguna izan zaitezke. Eman izena mintzapraktika egitasmoetan, izan bidelagun!

 
Euskaraz bizitzeko herritarren nahia oinarri, dinamika zabala sortu gura da hilaren 13an:


- Menditik ibilaldia (Taraskatik, 8:00etan)

- Ume txikientzako ekintzak Lameran edo frontoian (Lameran 11:30ean)

- Ginkana umeak gurasoekin ta gaztetxuak bakarrik (Lameran 11:30ean)

- Denon artean “Euskaraz bizi nahi dut" lasterketa ( Lameran 12:30ean)

- Kalinpan Lameran ibiliko da 11:30etik aurrera

- “Euskaraz bizi nahi dut” dantza koreografiaz (Lameran 13:00ean).

Ekintza guztiak 13:00etarako amaituko dira eta parte hartzaile guztiak elkartuko dira Lameran kanta dantzatzeko eta amaierako ekitaldiari hasiera emateko: Zenbait opariren zozketa, bertsolariak, irrintzilariak eta txalapartariak, Berbalagun lehiaketako zozketa, e.a.

Ekimen guzti honetan, adierazi gura denaren seinale edo identifikatzaile gisa, ekintzetan parte hartzen duen jendeak “Euskaraz bizi nahi dut” lema ageri duen kamiseta soinean eramatea eskatzen da. Ekimenak sortzen dituen gastuak estaltzeko, parte hartzean, ordainketa bat eskatzen da:

Umeak (14 urte bitarte): 2 euro (kamiseta erosiz gero, 7 euro)
Helduak: 5 euro (kamiseta erosiz gero, 10 euro) 



Badakizue, etorri, parte hartu eta hitz egin #lotsarikgabe.

2014/12/09

Arrantzaleen museorako bisitak: kronika


Pasa den astean Arrantzaleen museoko zaharberritze-lanak ezagutzera joan ginen, talde bakoitza bere hitzorduan, eta guztiz aldatuta topatu genuen, barrutik eta kanpotik ere.
Solairu bakoitza izan zen oso interesgarria, sarrerako bideotik hasita. Deigarria izan zen igogailua, asko gustatu zitzaigun, zer esanik ez gainontzeko guztia.

Bermeora hurbiltzen zaretenean ezin zarete joan museoa bisitatu barik herriko izaera, lehengo eta gaur egungoa, ulertzeko. Itsasoarekiko lotura oso ondo azaltzen da, zentzu guztietan.

Talde batzuk bisitatu zuten goizez eta bistak disfrutatu zituzten baina gauez ere oso ondo ikusten zen paisaia, ilargi beteak lagunduta.

Adi ikusi eta entzun genituen bideoetako azalpenak, baita gogoetak eta haien inguruko bizipenak komentatu ere. Berbetan luze egoteko aukera izan genuen, inork ez zuen irten nahi eta berriro bueltatuko garelakoan agurtu genuen elkar. Eskerrik asko Haizea eta museoko guztiei emandako azalpenengatik!

2014/12/05

Zinea euskaraz eta Mikel Markezen kontzertua

Gaur goizean zozketatu ditugu sei sarrera asteburu luze honetan zinera joateko, eta atzo iluntzean oso gustura egon ziren Mikel Markezen kontzertuan, argazkian ikusten denez.

Eskerrik asko Agurtzane, sarrera bikoitza eskuratu eta gero argazkia bidaltzearren, pozten gara gustura egon zinetela ikustean, anima zaitezte pelikula ikustera zoaztenak gauza bera egiten, behintzat esaiguzue gustatu zaizuen... ondo pasa zubi honetan!

2014/12/04

Berbataldeak

Hurrengo talde hauetan eman dezakezue izena #lotsarikgabe, ez badago interesatzen zaizuen ordutegian jarri kontaktuan eta konponduko dugu, ziur talde berriren bat sortuko dela abendutik aurrera ere! Zer egin behar duzue? Eman izena zuzenean edo deitu, idatzi, kontaktatu eta hitz egingo dugu: 607 609 580 / bermeoberba@gmail.com

Astelehenetan elkartzen da talde bat eskulanak egiteko, datorren astean jaieguna denez asteartean, eta gainontzeko taldeak astero elkartzen dira. Ez dago arazorik talde baten baino gehiagotan parte hartzeko, baina kontuan hartu behar dugu talde batzuk ordua edota topalekua alda dezaketela, taldeak autonomoak dira. Partaideek ez dute ordaintzen, konpromisua da taldera joatea eta abisatzea ez egitekotan.

Ekintza osagarriak ere antolatzen ditugu guztion artean, gustuko ekintzak, aste honetan adibidez Arrantzaleen museora joatea erabaki zen. Nahiz eta astero etorri ez, eman dezakezue izena ekintzetan parte hartzeko taldekideekin batera, baita ekintzak proposatzeko.

Azkenez, herrian eta herritik kanpo antolatzen direnetan parte hartzen dugu eta horrek laguntzen digu harreman berriak egiten, ezezagunekin hitz egiten, esperientzia berriak izaten. Adibidez gaurko kontzertura joango da Agurtzane, sarrera bikoitza zozketatu genuen atzo eta berarekin batera David joango dela esan digu, iluntzeko 8etan izango da, argazkia bidaltzen digutenean hemen argitaratuko dugu.

2014/12/03

Euskararen egun on

Pasa den larunbatean ospatu genuen euskararen nazioarteko eguna Kafe Antzokian, "Berba eta kafea" ekitaldian. 


Hainbeste lagunen artean pasatu genuen goiza, gaurko eta antzineko berbei buruz gogoetak eginez. 

Azken finean, zer da batzen gaituena?



Urte honetan zehar momentu on asko konpartitu ditugu eta horietako batzuk argazkietan islatu ditugu, beste batzuk guretzat gorde ditugu inon islatu barik.



Ezezagunak izan ginen eta taldeetan elkartzen gara euskaraz berba egiteko, euskaraz bizi ahal izateko, besoak zabalik Bermeoko berbalagun guztiontzat. Gaur geratu gara 10:30ean Arrantzaleen museoa bisitatzeko eta 16:15ean Elai Alai aretoan irakurraldirako, gero arte!

2014/12/02

Zinea euskaraz

Euskera Sailak gonbidatu gaitu zinera asteburu honetan, Loreak pelikula euskaraz Bermeoko Nestor Basterretxean hurrengo egun hauetan:

- Ostiralean 19:00etan eta 21:30ean

- Larunbatean 21:30ean

- Igandean 19:00etan


- Astelehenean 19:00etan eta 21:30ean

 
Ostiral goizean, gurasolagun taldean, zozketatuko dira berbalagunen artean banatzeko 6 gonbidapenak, goizeko 10etan. Hemen argitaratuko dugu nortzuk izan zareten irabazleak eta sarrerak leihatilan hartu behar dira, izena esanda nahikoa izango da.


Eman izena #lotsarikgabe!

2014/12/01

Arrantzaleen museora

Arrantzaleen museoa bisitatuko dugu aste honetan zehar, talde bakoitza bere kabuz, zaharberritze-lanak bukatuta.

Taldeak Torronteron bertan geratuko dira eta hitzorduak dira:

Astearte arratsaldean, 17:30ean.

Asteazken goizean, 10:30ean.

Ostegun arratsaldean, 18:00etan.

Animatu eta eman izena haiekin batera museoa ikusteko, merezi du eta!

bermeoberba@gmail.com  /  607 609 580

Kontzerturako sarrera bikoitza

Bermeoko Kultura Saliak gonbidatu gaitu osteguneko kontzertura joateko eta sarrera bikoitza zozketatuko dugu etzi, hilaren 3an, nazioarteko euskeraren egunean, goizeko 11:30ean Arrantzaleen museoan. 


Deitu 607 609 580 zenbakira eta esan izen abizenak zozketan parte hartzeko!

2014/11/27

Abenduko agenda

Abenduan denetariko egiteko aukera izango dugu, ekintza guztietan aurkituko duzue berbalagunen bat, askotan berbalagun talde osoak, eman izena #lotsarikgabe!

2014/11/25

Danbor hotsak Afrikatik: kronika

Pasa den ostiralean hitzaldi aretoa bete zen Itxasoren bidaia eta bizipenak ezagutzeko, oso erakargarria izan zen Afrikako eguneroko bizitza irudiz ulertzea eta Itxasok gaika antolatutako aurkezpenak lagundu zigun horretan: baliabideak, arriskuak, erritoak, harremanak, tramiteak...


Laster hasi ginen konparatzen Bermeoko orain dela berrogei urteko bizitza eta Itxasok azaldutakoa, Itxasok zortzi hilabetez bizi izana batzuei ezaguna egin zitzaien eta berez sortu zen tertulia. Amaieran bideo batean laburbildu zuen Itxasok bere bidaia eta txalo-zaparradaz bukatu genuen.

Hala eta guztiz, batzuk luze geratu ziren berbetan, irteteko inolako gogo barik, eta ostirala pintxo-potean amaitu zen. Eskerrik asko Itxaso eta etorri zareten guztiei!

2014/11/11

Erroxape elkartearekin bat

Erroxape elkartekoak animatuko dira josten Korrikaren alde eta geratu gara ostiralean, arratsaldeko seietatik aurrera, dena azaltzeko. Hurbildu euren lokalera, Erreten lamerakora, eman izena eta telefonoa kontakturako eta patchwork taldekoak han egongo dira laguntzeko.... eskerrik asko Marijose!

Badakizue eskualdeko auzolana izango dela, honako hitzordu honetan eskuratu dezakezue behar den guztia:
- Gernikan ostegunetan, 19:00etatik aurrera, lehengo "Correos"eko lokalean, Elai-Alai aretoaren aurrean, udaletxeko plazan.
- Bermeon astelehenetan eta ostiraletan, astelehen goizetan 11:30etik aurrera euskal gunean eta ostiraletan Erroxape elkarteko patchwork taldean arratsaldeko 16:30etik aurrera.

Eskerrik asko guztioi!

2014/11/10

Nire bidaia: danbor hotsak Afrikatik

 Datorren asteko ostiralean Afrikara joango gara Itxasoren bidaiaren bitartez:
“Zuek erlojuak izango dituzue, baina denbora geuk daukagu”. Esaldi honekin hartu ninduen Afrikak bere beso artean, eta esaldi honekin laburbildu zidan bere esentzia; iturririk gabe ozeanoak edango nituen, libururik gabe ikasketarik garrantzitsuenak barneratu, oinetakorik gabeko ibiltaririk apartenak ezagutuko nituen, elikagai faltaz puzturiko sabelak ukitu.
 Guztia eta ezereza oparitzen dizkizu haur bihotzdun erraldoi honek: Irribarreak eta gosea. Danbor hotsak eta malaria. Itxaropena eta korrupzioa. Uholdetan itotako lehorteak. Kontraesan superlatibo batek deskribaturiko unibertso xelebrea. Kolorerik izatekotan, zalantza izpirik gabe (edo izpi ugarirekin, hobeto esanda) eguzkiaren soineko laranja da nagusi bere lurrazalean, bere itsasoetan, bere erritmo beroetan, bere keinu loratuetan, bere etsipena eramateko modu alaian.
 Afrikan ez dago minuturik, ez dago ordurik. Afrikak oraina eskaintzen dizu; eta hobe zenuke bere ofrenda gazi-geza onartu, eskain dezakeen bakarra izan daitekeelako.
Etorri arratsaldeko sei eta erdietan hitzaldi aretora (Gizarte eta Kultura Etxea, hirugarren solairua) eta Afrikara joango gara #lotsarikgabe!

Gurasolagun batzarra

Pasa den asteko tailerrean zalantza eta galdera batzuk sortu zitzaizkizuen baina ez zen momentu egokia luze gurasolagun egitasmoa aurkezteko eta gurasolagun ekintzei buruz hitz egiteko, horregatik elkartuko gara berriro gurasoak etzi gaztelekuan arratsaldeko sei eta erdietan dena argitzeko eta lasai mintzatzeko.

Bide batez, nahi baduzue pendrive ekarri, Aitorrek ekarritako kantak etxera eramango dituzue, ados?

Hitzaldia: Islandiako lasterketa

Ostiraleko berbalagun taldea Julen Urdaibaik eman zuen hitzaldira joan zen arratsaldeko 7:30ean Nestor Basterretxea aretoan: Fire & Ice Ultra, Islandian izandako lasterketari buruz. Bertan beste lagun batzuekin elkartu ziren eta arratsaldea luzatu zen mendiari eta lasterketei buruz mintzatuz, plan ona!

Badago Irish tabernan berbalagun lehiaketan parte hartzeko aukera, orriak eta postontzia han ere topatuko dituzue, ostiraleko taldea bertan geratzen da arratsaldeko bostetatik aurrera.

2014/11/07

Josi eta josi


 
Atzo goizean aurkeztu zen 19. Korrika eta gu arratsalderako lanean, Busturialdeko berbalagunok elkartu ginen telak banatzeko eta hasi ginen josten, berba eta berba... 



 Batzuk oso trebeak dira eta atzo bukatu zuten laukitxoa, beste batzuk etxera eraman genuen eta datorren astean leku eta ordu berean elkartuko gara berriro, ia ondo ulertu dugun eta ondo irtetzen den... jostun finak, badakizue lehenengoa beti izango dela zailena, hurrengo guztiak berez! 


Inor gehiago animatzen bada Korrikaren alde josten, deitu mesedez (607 609 580) edo izena eman hemen (klik egin) eta deituko dizuet. 

Momentuz lehenengo batzarra izango da astelehenean, hilaren 10ean, berbalagun gelan (euskal gunea, Atalde 17) goizeko 11:30ean azalpenak emateko eta nahi duenak materiala etxera eramateko. Han egongo da talde bat josten astero, izena eman zeuk ere!

Irakurri gehiago Gernika-Lumoko berbalagunen blogean + (klikatu)

2014/11/06

Gurasolagun tailerra: kronika

Atzo arratsaldean geratu ginen gurasoak eta umeak elkarrekin jolasteko, kantatzeko, eta ondo pasatzeko.

Urtxintxako lagunak, Aitorrek, azaldu zigun zein izango zen plana, eta hasi ginen izenak gogoratzeko jolas batez.

Ez zuen euririk egin eta aprobetxatu genuen kanpoan jolasteko.

 
Ordua aurrera joan ahala beste ume eta guraso batzuk hurbildu ziren, Aitorrek gonbidatu zituen jolasetan parte hartzeko eta ez zuten bi aldiz pentsatu: hasierako taldea hazi zen. Orduan ekin genien korru jolasei eta dagozkien kantak ikasi genituen.

Antza oso ondo kantatu genuen, aterri geratu zen arratsaldea eta ilundu arte kanpoan egon ahal izan ginen.


 Zazpietako bueltan sartu ginen denok batera, El Tendereteko lagunek ikuskizuna prestatzen zuten bitartean alboko gela baten umeek eta nagusiek bete zuten Aitorrentzat balorazio labur bat eta jarraian txotxongiloei gertatu zitzaiena ezagutzera joan ginen guztiok.

Emozioz ia ia ez genuen Aitor agurtu.... mila esker Aitor eta hurrengo batean bueltatu!



Oso gustura aditu genituen pertsonaien abenturak, batzutan atetik, altzoetatik... eta bapatean gortinak ireki ziren eta txotxongiloak irten ziren kanpora, bazeuden han Manya eta Lito, harrigarria egin zaie.

 
Berez heldu zen etxera joateko ordua baina arinago taldeko erretratoa, zelan ez!


Eskerrik asko gurasolagunok!

2014/11/05

Antzerkirako gonbidapena


Gaur goizean asteazkeneko taldekoek zozketatu dute gonbidapen bikoitza datorren asteko bakarrizketa ikustera joateko, 15 berbalagunek eman dute izena zozketan eta gonbidapena tokatu zaio Yoliri, eskerrik asko taldekideok, laguntzearren!

Josteko tailerra

Gernikako berbalagunek proposatu digute josteko tailer batean parte hartzea, Hitzan argitaratuko da gaur:
Bihar arratsaldeko 7etan Gernikako Elai Alai aretoan elkartuko dira interesdunak oheko tapaki handi bat elkarlanean josteko. Bihar argibideak emango zaizkie, azalpen guztiak, zalantzak argitu, eta euren aukera izango da norberaren etxean egin edo tailer moduan berbalagun talde bat egin josteko, taldeak aukeratutako egunean eta orduan, betiko moduan.
Patchwork teknika izango da eta tailerrekoek aukeratuko dute zein izango den azken diseinua. Proposamena dago amaieran zozketa bat antolatzeko eta horretarako boletoak saldu, telak ordaintzeko eta soberan dagoena 19. Korrikarako.
Nahiz eta norberak etxean egin, hamabostean behin batzartuko dira tailerreko guztiak eta urtarrilaren amaierako tapakia montatuko dute zozketarako. Biharko batzarrean telak bananduko dira, partaideek ez dute dirurik aurreratuko. Animatu eta badakizue: #lotsarikgabe josi!

2014/11/03

Udazkeneko lehiaketa


Abian dago berriro berbalagunon lehiaketa, orriak eskura dituzue euskal gunean, Hizkuntza Eskolan, Gizarte eta Kultura Etxean, udal liburutegian, Akatz eta Irish tabernetan, bete eta postontzian sartu azaroaren 28a baino lehen. Ez ahaztu zuen datuak idazten, abenduaren 13an jakingo dugu nor den irabazlea. Horretarako euskaraz bizi nahi dut amaierako ekitaldian geratu gara lameran eguerdiko ordu bata inguruan, bertan aukeratuko da irabazlea lehiaketako partaide guztien artean. 





Orain arte papera izan da lehiaketan parte hartzeko aukera bakarra baina oraindik aurrera blog honetatik ere bete dezakezue, galdera errezak dira eta animatu parte hartzen! Zalantzarik izanez gero deitu 607 609 580 telefonora, bai? Eskerrik asko!

2014/10/30

Azaroko agenda

Begira zenbat hitzordu azarorako, ez galdu aukera eta etorri, parte hartu, hitz egin #lotsarikgabe!

2014/10/29

Liburutegirako bisita: kronika

Pasa den ostiralean liburutegia hobeto ezagutzera joan ginen, Belenek azaldu zigun harreragunean non egon zen liburutegia oraingo eraikinean egon aurretik eta umeentzako txokoa ikusi genuen lehenik eta behin.


Jarraian bisitatu genituen liburutegiko atal guztiak solairuz solairu, hemeroteka, ikus-entzunezkoak... Belenek azaldu zigun zein den ordena, haien lana liburuzain moduan, zelan eskatu nahi duguna, baita ez dakigunean zer eskatu ere!



Asko gustatu zitzaigun Bermeori buruzko gunea, atera genituen Akatz aldizkariak (2004 urtetik aurrera ez da gehiagorik argitaratu) eta Bermeoko hizkera lantzen duen liburuak. Taldekoak bertan hasi ziren irakurtzen baina hobeto pentsatu eta gero etxerako eramatea erabaki zuten.



Azken sorpresatxoa laugarren solairuan egon zen, aspalditik erabiltzen ez den makina Belenek matxan jarri zuenean.... oso arratsalde interesgarria izan zen, eskerrik asko Belen!