Ondo amaitu, praktikatu eta bizi

Pasa den ostiralean 2017ko azken topaketa izan genuen eta bihar arratsaldean elkartuko da azken taldea, Erreten lameran 18:15etik aurrera. Hasi gara urtea agurtzen baina urtarrilaren 8an hasiko gara berriro elkartzen astero, eskerrik asko aurten gurekin praktikatu eta bizitzearren!

2017ko azken topaketa

Gutxi falta da urtea amaitzeko eta 2017ko azken topaketara gonbidatzen zaituztegu abenduaren 15ean, ostiral arratsaldean, lameran 17:00etatik aurrera. Berbalagun taldekoak izan ala ez, ongietorriak izango zarete gurekin #praktikatuetabizitzera.

Udazkeneko lehiaketaren saria Jose Luis Luzarragarentzat Euskaraz Bizi Nahi Dut egunean

Pasa den ostegunean heldu ziren euskal gunera Errigorako otzarak eta zozketatu genuen zuri bat erantzun duzuen guztien artean, 157 guztira, mila esker zuen parte hartzearren. Irabazle suertatu zen Jose Luis Luzarraga eta atzo, euskararen nazioarteko egunean, Euskaraz Bizi Nahi Dut amaierako ekitaldian, entregatu genion: Zorionak Jose Luis!

Goizeko bederatzietan joan ziren berbalagunak mendira, aupa zuek! 
Oizmendin ikusi...+ 
Bermeo iruditan: bideoa...+
Busturialdeko Hitzan...+

 Honako hauek izan dira erantzun zuzenak:
1.- Lotu:

Ke gabeko surik ez

Dakienak daki, ez dakienak baleki

Urak dakarrena, urak darama

Zelako egurra, halako ezpala

Hori da ahuntzaren gauerdiko eztula

Umeen zentzuna, etxean entzuna

Nolako irin, halako ogia

2.- Nongoak dira Errigorako produktuak? Nafarroakoak.

3.- Beremoko kantaren arabera, zenbat laguntxu gara, kuadrilla batean? Zazpi.

4.- Non pasatuko dute negua aurten Antonek, Marik, Lorentzok eta Josefinek? Arrantzaleen museoan.

Gabonetako tailerra bertan behera

Bihar hasiko zen eskulan tailerra bertan behera geratzen da monitorea gaixorik dagoelako, barkatu. Saiatuko gara eskulan tailer berri bat antolatzen datorren urtean, eskerrik asko izena eman duzuen guztiei!

Abenduko agenda

Biharko hitzaldian hasi eta abendu osoan badago non #praktikatuetabizi:

Errigora batu ostegunean

Ailega dira Errigorako otzarak euskal gunera (Atalde 17) eta orain batu behar ditugu. Horretarako geratu gara ostegunean, hilaren 30ean, arratsaldeko 19:00etan eta gogoratu batzeko momentuan eskatutakoa ordainduko dugula, 50€ otzarako. Zalantzarik edo abisurik izanez gero, harremanetan jarri (607 609 580).
Ostegun berean amaituko da epea udazkeneko lehiaketan parte hartzeko eta egun horretako taldean, goizeko 12etan, zozketatuko dugu lehiaketako saria, Errigorako otzara, euskeraren egunean, domekan, irabazlea suertatzen denari entregatzeko.
Lehiaketako orritxoa bete baino ez duzue egin behar, eta topa duzuen lekuan bertan utzi (kulturetxean, euskal gunean, liburutegian, Hizkuntza Eskolan, Irish pub, Loidxie). Aprobetxatu azken egun hauetan lehiaketan parte hartzeko eta zorte on!

Gabonetarako eskulan tailerrak

Gabonetarako eskulan berriak egitea proposatu digu Montse Alonsok eta hiru tailerretan landuko ditugu abenduko astearteetan: 5, 12 eta 19an, arratsaldeko 17:30etik 19:00etara euskal gunean (Atalde 17). Hasierako eskulana Gabonetako bolatxoa izango da, abenduaren 5ean, eta izena ematea 3€koa izango da, norberak erabiliko duen materiala ordaintzen laguntzeko.
Tailerretan parte hartzeko izena ematea derrigorrezkoa da (607 609 580) eta tailerrean bertan ordainduko da. Gutxienez 8 partaide eta gehienez 16 egongo dira. Tailerra aproposa da 10 urtetik gorako seme-alabekin etortzeko eta kasu honetan adierazi behar dugu zenbat eskulan nahi dugun egin, pertsonako edo familiako. Badago aukera egun bakarrean etortzeko eta edozein zalantza argitzeko, jarri mesedez kontaktuan gurekin telefonoz edota bermeoberba@gmail.com helbidean.

Annapurna 360ºtan: kronika

Pasa den ostegunean eguneroko bizitzatik deskonektatu eta Annapurnara joan ginen Manexekin, bere bideo eta argazkien bitartez hango errealitatea hobeto ezagutzera. Manexek mapan kokatu zuen Annapurna eta egunez egun berarekin egin genuen berriro berak aukeratutako ibilbidea, berarekin batera hango herrixkak, idazkera, ohiturak, bizi-baldintzak ulertzen. Oso interesgarria izan zer eta labur geratu zitzaigun, gehiagorako gogoz igo ginen Talako kantinera zeozer hartzera elkarrekin.
Momentuan Manexek eskaini zigun honen jarraipena egitea eta Everest ezagutzea. Baietza borobila izan zen eta data finkatu genuen: otsailaren 8an, arratsaldeko 7etan Annapurnatik salto egingo dugu Everestera,
mila esker Manex, plazera da beti, zurekin #praktikatuetabizi berez egiten da!
Argazki gehiago...+

Gurasolagunak ispiluari begira: kronika

Pasa den larunbatean gurasolagunak geratu ziren kulturetxean ispiluari begira hizkuntza ohiturei buruz hausnartzeko eta bide batez goiz berezia familian pasatzeko.

Hasi ziren gurasoak gaztelekuan berbetan, UEMAko Eneritzen laguntzaz, eta umeak ludotekan lan eta lan UEMAko Axunen gidaritzapean.

Umeek irudikatu zuten haien eguneroko hizkuntza hiru eremutan: eskolan, etxean eta lameran jolasetan. Bakoitzean erantzun zituzten galdera zuzenak: zein hizkuntzatan hitz egiten dut nik etxean, eskolan, jolasean? zein hizkuntzatan egiten didate niri? zein hizkuntzatan egiten dute gurasoek haien artean? eta gurasoek niri?
Antza umeek ez dakite gezurrik esaten eta erantzun guztiak zenbatu zituzten lau koloretan: euskara berdez, euskara eta erdara horiz, erdara gorriz eta besteren bat urdinez.

Hiru hormairudiak amaitu eta gero gaztelekuan elkartu ziren gurasoekin emaitzak aztertzeko eta datu deigarriak nabarmendu zituzten: neba-arrebekin guztiek esan zuten euskara hutsean aritzen direla etxean, gorri gehiena agertu zen gurasoen artekoan eta umeen artean ez zen gorririk agertu. Azalpenak ulertzeko oso baliogarri izan zitzaien semaforoa eta jarraian Eneritzek eskatu zien identifikatzeko pantailan agertu ziren aurpegi ezagunak...zeregina burutu zuten inolako trabarik gabe, guztien artean.

Tailerrari amaiera emateko taldeko argazkia atera zuten eguerdiko ordu bata jotzear, eskerrik asko Axun eta Eneritz, hurrengo batera arte!

Argazkiak ikusi....+

Oizmendi telebistan...+

Annapurna 360ºtan

Annapurna ikuspegi zabaletik ezagutuko dugu Manex Duo lagunari esker, berak aurkeztuko digu egindako bidaia datorren asteko ostegunean, hilaren 23an, arratsaldeko 18:30ean Gizarte eta Kultura Etxeko hirugarren solairuan, hitzaldi aretoan.
Etorri bere argazkien bidez bidaiatzera eta lagunen artean ikusitakoa komentatzera, beste errealitate batzuei buruz berba egitera.

Betiko moduan, sarrera libre da, doan eta guztientzako aproposa. Etorri, parte hartu, #praktikatuetabizi.

Herrilana: bihar azken eguna otzara eskatzeko

Bihar amaituko da epea Errigorako loteak eskatzeko, zuria eta beltza. Ez baduzue oraindik eskaera bideratu, deitu edo bidali mezu bat 607 609 580 zenbakira eta gure bitartez eskatuko duzue.
Gogoratu hilaren 30ean helduko direla euskal gunera eta egun horretan ordainduko dugula eskatutakoa, jasotzeko momentuan, orain eskaera egiteko epea da amaitzen dena. 

Animatu zuek ere herrilanerako, #praktikatuetabizi.

Antzerkirako gonbidapena

Datorren ostiral gauerako plana proposatuko dizuegu: Ez dok hiru antzezlana ikustera etorri Bermeoko Kafe Antzokira 21:00etan. Sarrera bi zozketatuko ditugu etzi arratsaldeko seietan berbalagun taldean eta zozketan parte hartzeko zuen izen-abizenak bidali baino ez duzue egin behar telefono zenbaki honetara: 607 609 580. Animatu antzerkira joaten, #praktikatuetabizi.

Informazio gehiago..+

Azaroko agenda eta taldeak

Azaroan ere mota guztietako hitzorduak aukeran: irteerak, tertuliak, antzerkia, gurasolagun tailerra...#praktikatuetabizi

 

Gurasolagunak ispiluari begira

Gurasolagunak seme-alabekin elkartuko gara ispiluari begira UEMAk dinamizatutako tailer batean hilaren 18an, goizeko 11etatik ordu batera, Gizarte eta Kultura Etxeko ludoteka eta gaztelekuan. Izena ematea doan da, azaroaren 10a baino lehen. Tailerra aproposa da adin guztietako gurasoentzat eta sei urtetik hamaika urtera arteko seme-alabentzat.
Tailer honetan gure inguru hurbila ikusiko dugu ispiluan, eguneroko harremanetako hizkuntzari buruz hausnartuz. Hasieran talde bi egingo ditugu:
- Umeak ispilu: abestu eta margoztuko dute kolorearen arabera etxea, parkea, eskola...gero gurasoekin ikusteko. Hormairudiak egiteko gogoa eta, nahi baduzue, ekarri etxetik margo batzuk eta artaziak (badakizue, kolore polit hori, gehien-gehien gustatzen zaizuena, normalean falta izaten dena eta etxean beti erabiltzen duzuena).
- Gurasoak ispilu: herriko hizkuntza, arnasguneak, norberaren hizkuntza aukeraketa.
Amaieran elkartuko gara guztiok eta ezagutuko dugu talde bietako emaitza, ia ispilu garen.
Izena emateko deitu edo bidali mezu bat (whatsappa ere) zenbaki honetara 607 609 580. Nahiago baduzue idatzi bermeoberba@gmail.com e-postara. Familian ere #praktikatuetabizi.
Oharra: gutxienez zortzi guraso apuntatu behar dira, bestela ezin izango da tailerra egin.

Udazkeneko lehiaketa

 

Kaleratu da udazkeneko albistegi eta lehiaketa, jaso orritxoak kulturetxean, liburutegian, tabernetan, euskal gunean, edo bete online bertotik eta parte hartu!

Erantzuten duzuen guztien artean Errigorako lote osoa zozketatuko da abenduaren hasieran eta orduan argitaratuko ditugu erantzun zuzenak. Zalantzarik baduzue, galdetu berbalagunen bati, asteroko taldeetan ere arituko dira lehiaketaren harira berbetan...etxean, kalean, tabernetan, #praktikatuetabizi.
(Errigorako otzara zuria edota beltza eskatzeko, gure bitartez ere egin dezakezue: 607 609 580. Jasotzean ordaintzen da, azaroaren 30ean, 19:30-20:30, Bermeoko euskal gunean).

Gonbidapenen zozketa

Atzo arratsaldean zozketatu genituen gonbidapenak eta irudiko berbalagun bakoitzak bi sarrera eskatu ahal izango ditu bere izenean Nestor Basterretxea aretoko lehiatilan asteburu honetan Handiak ikusteko. Zinean ere #praktikatuetabizi.

Bazatoz zinera?

Asteburu honetan Handia ikusteko sei gonbidapen eskaini dizkigu Euskera Sailak eta interesdunen artean zozketatuko ditugu etzi, goizeko taldean. Lehiatilan egongo dira sarrerak, izen abizenak esan baino ez duzue egin behar.

Hala eta guzti, gonbidapenak ez du jesarlekua bermatzen. Sarrerak agortuko balira, hurrengo emanaldirako sarrera emango da. Ordutegia aukeran: Larunbatean 19:30ean edo 22:15ean, igandean 19:30ean, edo astelehenean 19:00etan edo 21:30ean.

Talde berri bi

Talde berri bi sortuko dira asteazkenetan; urriaren 25ean goizeko 11:30ean hasiko da bat eta asteon elkartuko da bestea, etzi arratsaldeko 6etan Erreten lameran. Interesatzen bazaizue, deitu edo bidali mezu bat telefono zenbaki honetara: 607 609 580. Guk deituko dizuegu geratzeko. Animatu, #praktikatuetabizi.

Urriko agenda eta taldeak

Agendan apuntatzen ditugu proposamen interesgarrienak euskaraz bizitzeko, deskargatu irudia eta kontuan hartu. Hilabetero argitaratzen dugunez, bide batez asteroko taldeen taulatxoa erantsiko dugu, hilabete bakoitzean non eta zer ordutan elkartzen diren gogoratzeko.

Urriaren 19an abiatuko da berriro irakurleen txokoa, udal liburutegian, hara joan behar duzue izena emateko (doan). Hilabetero irakurriko dugu euskaraz eta txokoan elkartuko gara irakurritakoa komentatzeko, idazlea eta bere obra hobeto ezagutzeko. 19rako irakurriko dugu online eskuragarri dagoen narrazio laburra (Igerilaria, klikatu +) eta gainontzeko zerrenda adostuko dugu. Irakurleen txokoa ostegun arratsaldeetan izango da, hilabeteroko hirugarren astean, 18:30etik aurrera.
Zuek ere proposatu agendan aurreikusten duzuena azarorako eta berbalagun agendan agertuko da, #praktikatuetabizi.

Aurkezpenak

Atzo izan zen aurkezpen publikoa eta egunotan izango dira euskaltegi eta Hizkuntza Eskolako aurkezpenak, ikasturte berrian berbalagunok egiten duguna ezagutarazteko. Lagundu zuek ere zabaltzen, guztion artean praktikatu eta euskaraz bizitzeko.

Lehenengo taldeak

Hasi dira lehenengo taldeak elkartzen, momentuz bi goizez eta beste bat ostiral arratsaldez. Deskargatu irudia eta etorri nahi duzuenean, ahal izango duzue eman izena taldean bertan. Ez badira zuentzat aproposak, ez kezkatu, eman izena hala ere eta saiatuko gara beste talde batzuk osatzen, aurkituko dugu ordutegi edota egun aproposa talde batean egoteko. Izena ematean adierazi oharretan mesedez noiz nahiago duzuen eta listo, deituko dizuegu. Ostiraleko taldea luzeagoa izaten da, ordubete baino gehiago normalean.

Eman izena gaur bertan 607 609 580

Gaur bai amaitu direla jaiak, oporrak eta ospakizun bereziak baina ez kezkatu, eman izena gaur bertan eta jarraituko dugu berbalagun taldeetan, egiten duguna da #praktikatuetabizi.

Deitu edo bidali mezu bat edozein modutan:  
607 609 580 telefonora,
 bermeoberba@gmail.com helbidera, facebookera, klikatu irudia eta eman izena, galdetu irakasleari, lagun eta ezagunei... hurbildu eta euskaraz bizi, hasteko eta gutxienez astero ordubetez, gero gerokoak.

Ondo ibili, praktikatu eta bizi irailera arte!

Irailaren amaieran hasiko dira asteroko taldeak martxan berriro, badakizue asteazkenero elkartuko dela udako taldea lameran arratsaldeko zortzi eta erdietan, abuztuaren amaiera arte. Datorren asteko asteazkenean, uztailaren 12an, hasiko da udako taldea.
Oporretan ere praktikatu eta bizi!

Udaberriko lehiaketaren sariduna

Atzo entregatu genuen ikasturteko azken saria, Errigorako oliba olioa, bost litroko bidoia, zozketan suertatu zen saridunari, Mikel Madariagari. Udaberriko lehiaketan 76 lagunek hartu duzue parte, eskerrik asko guztiei!
Honako hauek izan dira erantzun zuzenak:

1. Lotu:

   1. Jabe askoren txakurra goseak hil

   2. Pazko euritsu urte ogitsu

   3. Leku guztietan txakurrak oinutsik

   4. Kazola bateko sardinak denak berdinak

   5. Usteak erdi ustel

   6. Zenbat buru hainbat aburu

   7. Txapel batekin ezin estali bi buru

2. Udaberria heldu da entzuten dugunean:  Kukua

3. San Juanetan dantzan egingo dugu:  Ipar haizetan

4. Bikoteka lotu:

·         Ekialdea          3     1. Berdea

·         Estribora         1     2. Gorria

·         Mendebaldea   4     3. Sortaldea

·         Babora           2     4. Sartaldea

Opor aurrekoa erromeridxen: kronika

Pasa den larunbatean erromeridxen ospatu genuen opor aurreko topaketa, egun osoko jai giroan. Goizeko 12etan elkartu ginen goiko plazan eta kalejiran eman genuen goiza berriro elkartu arte, elizpean dantzan. Zubiganetik frontoira joan ginen bazkaltzera eta ederto batean pasatu genuen arratsaldea, bazkalondoan kantuz eta berandu arte dantzan. Zozketatu ziren sariak eta datorren asteazkenean, kulturetxean, emango zaizkie saridunei arratsaldeko 8etan.

Nabaritu zen dantza batzuetan praktika hartu dugula ostegun arratsaldeko dantza taldean, gaur izango da taldeko azken eguna, bost eta erdietan. Zeozer hartuko dugu Kafe Antzokian elkar agurtzeko, hurbildu gaur arratsaldean, #praktikatuetabizi.

Ekaineko agenda

Ekaineko agendak dantza egiteko aukera ugari ematen digu, herrian bertan, asteburu honetan hasi eta hile amaiera arte. Aprobetxatu eta etorri, gurekin #praktikatuetabizi.

Errigorakoa batu

Gogoratzen duzue martxoan eskatu genituela Errigorakoak baina epe bitan batzen direla aurten? Errigorako olioa batu genuen apirilaren hasieran eta heldu da momentua eskatutako gainontzekoa batzeko: ekainaren 1ean eta 6an, iluntzeko zortzietatik aurrera, euskal gunean. Jasotzeko momentuan ordainduko dugu agindutakoa. Kontsumitzen dugunean ere #praktikatuetabizi.

Zorionak Juani eta eskerrik asko guztiei

Pasa den ostiralean elkartu ginen Bilbon egitasmo guztien dinamizatzaileak gure lanari buruz berba egiteko eta azken finean zuen beharrizanetara hobeto egokitzeko. 
Helburu berarekin eskatu genizuen martxoan zehar tokian tokiko egitasmoak baloratzea eta aukeran izena ematea zozketa batean formularioa betetzean. 
Bermeon oso balorazio ona jaso du egitasmoak, batetik bostera  (bosta altuena), 4.93 izan da batez bestekoa, eskerrik asko parte hartu duzuen guztiei. Zozketan saridunen bat astearteko taldeko Juani izan da eta atzo jaso zuen oparitxoa, zorionak!

Arrain azokarako bisita

Maiatzaren 19an arrain azoka bisitatu genuen, posturik postura nobedadeak ezagutzeko. Betiko moduan, kafetxu bat hartu genuen eta geuk eus karpan taldeko argazkia atera genuen. Gero, bisita gidatua egin genuen Mater itsasontzian, bajurako arrantza hobeto ezagutzeko eta arrantzaleen bizimodua ulertzeko. Oso azalpen interesgarria, arrain azokan ere #praktikatuetabizi.

Gurasolagunak Tertangan

Bermeoko familia bik asteburu-pasa egin zuten Urduñan maiatzaren 13 eta 14an eta asko disfrutatu dute Euskal Herriko beste gurasolagunekin batera, Urtxintxako hezitzaileek dinamizatuta. Esperientzia errepikatuko dutela esan dute, datorren urtean aukera sortzen denean, oso aberasgarria izan delako bai guraso bai seme-alabentzat. Familian ere nahi dugu #praktikatuetabizi.

Opor aurreko topaketa erromerian

Ekainaren 3an erromeridxe ospatuko da Bermeon eta berbalagunok elkar agurtuko dugu egun horretan, ikasturte amaierako opor aurreko topaketa eginez.
Gogoratu ekainaren 15era arte udako taldean izena emateko aukera izango duzuela eta uztailaren bostean elkartuko dela udako taldea lehenengoz lameran, iluntzeko zortzi eta erdietan.
Erromeridxe egunean eguerdiko 12etan geratuko gara goiko plazan eta hiru eta erdiak inguru frontoian bazkalduko dugu. Han egongo gara zortziak arte, lameran jarraitzeko dantzan Akerbeltz taldearekin gauera arte.
Bazkaltzeko tiketa aldez aurretik hartu behar duzue, 25€, eta ez ahaztu etxean egun horretan bertan!Bazkalondoan sari ezberdinak zozketatuko dira, boletoak gastuetan laguntzeko dira, hemen argitaratuko ditugu zenbaki saridunak, euro bat boletoko. Sariak: "3 egun hirian", "Aterpetxea lagun birentzat", alde zaharreko tabernarien saria.
Gogoratu ez dela zertan berbalagun taldekoa izan egun horretan gurekin egoteko, ezta bazkaltzera etortzeko ere, animatu zuen lagun, bikotekide, ezagun eta familiako guztiak, denontzako lekurik egongo da, #praktikatuetabizi.

Arrain azokarako bisita

Datorren asteko barikuan arrain azokarako bisita antolatu dugu talde ezberdinetako berbalagunak elkartzeko, baita berbalagun taldetakoak ez zaretenak ere, guztiak gonbidatuta gurekin arrain azoka ikustera etortzeko.
Arratsaldeko bostetan geratu gara lameran eta zortziak inguruan Alkartasuna Dantza taldeko dantzak ikusiko ditugu, lameran eta portu zaharran.
Iluntzean pintopotean amaitzeko esperantza daukagu, hamarrak inguruan Zubiganen hasita alde zaharretik. Etorri eta gurekin #praktikatuetabizi.

Udako plana

Egin duzue udarako planik? Berbalagunok talderen bat mantenduko dugu udan zehar, abuztuaren amaiera arte gutxi gorabehera. Printzipioz, asteazkenetan elkartuko gara, zortzi eta erdietatik aurrera, baina izena eman behar duzue udako taldean interestuta egonez gero, talde bakarra edo bat baino gehiago aurreikusteko.
Lehenengo eguna uztailaren bosta izango da eta lameran geratuko gara, asteazkenero uztaila eta abuztuan. Izena emateko klikatu blog honetako irudi aldakorrean eta bete formularioa guk zuzenean zuekin kontaktatzeko, edo telefono zenbaki honetan adierazi: 607 609 580 (Marimar).
Udan ere #praktikatuetabizi.

Udaberriko lehiaketa

Gaurtik aurrera eta hilaren 26ra arte udaberriko lehiaketan parte hartzeko aukera duzue, beste aukera bat #praktikatuetabizi ahal izateko. Saria Errigorako olioa izango da, bost litroko bidoia, eta epea amaitzen denean argitaratuko ditugu erantzun zuzenak eta irabazlearen izen abizenak blog honetan bertan.
Jasotako erantzun guztien artean zozketatuko da saria maiatzaren amaieran eta Erromeridxe egunean, ekainaren hiruan, gure opor aurreko topaketan, entregatuko dugu.
Postontzietan sartu behar duzue orritxoa beteta, edo hartu duzuen lekuetan eman, guk jasotzeko 26tik aurrera. Aurkituko dituzue tabernetan, liburutegian, euskal gunean, kulturetxean, Hizkuntza Eskolan eta berbalagun taldeetan. Aurrekoetan eta oraingo honetan ere, sareratuta dago, zuzenean betetzeko:

Gurasolagun tailerra: kronika

Pasa den asteazkenean elkartu ziren gurasolagunak Gizarte eta Kultura Etxeko sukaldean merienda desberdina egiteko. Urtxintxako Ainhoak ekarri zizkien frutak eta gainontzekoak, zalaparta puntuala izan zen beste behin ere: bost eta erdietan aurkezpen jolas batzuekin hasi eta gero, sukaldari txikiak merienda prestatzen hasi ziren. Eguraldi ederra izan zuten amaieran kanpora joateko jolastera eta elkar agurtu zuten azken argazkia atera eta gero. Eskerrik asko Ainhoa eta parte hartu zenuten guztiei, familian ere #praktikatuetabizi!

Maiatzeko agenda

Maiatzeko agendan azpimarratu ditugu hitzordu bereziak eta asteroko berbalagun taldeak. #Praktikatuetabizi maiatzean ere.

Gurasolagun tailerra: familian euskaraz

Gaur zortzi, maiatzaren 3an, ikasturte honetako azken gurasolagun tailerra izango dugu Urtxintxako dinamizatzaile batekin, familian euskaraz jolasteko. 

Oraingoan Gizarte eta Kultura Etxeko bigarren solairuan geratuko gara guraso eta seme-alabak elkarrekin plater dibertigarriren bat egiteko sukaldean, inolako arrisku barik, dena hotza.
Gero, eskuak garbituko ditugu eta jolastuko dugu tarte batean, zazpi eta erdietara arte. Eguraldiak laguntzen badu, kanpora irtengo gara jolasteko, bestela bigarren solairuan bertan. 

Izena emateko 607 609 580 telefonoan edota bermeoberba@gmail.com helbidean. Maiatzaren bia azken eguna izango da eta tailerra aproposa izango da lau urtetik gora. Familian #praktikatuetabizi.

Asteon betiko moduan

Hasi gara oporretatik bueltan eta asteon elkartuko gara betiko moduan, zalantzarik baduzue edo informaziorik behar baduzue deitu edo idatzi 607 609 580 telefonora edota bermeoberba@gmail.com helbidera.
Opor aurreko astea ez dugu ahaztuko, aste hasieran gurasolagunek amaitu zuten midori estiloko agenda, Montse Alonsoren aholkuak jarraituz, eta oso agenda politak eraman zituzten etxera.
Argazki guztiak...+

Berbalagunok lehenengo aldiz hartu genuen parte Korrikan talde moduan, eskerrik asko AEK! Eta aste amaieran ospatu genuen gure opor aurreko topaketa, elkar agurtzeko.

Bide batez, Errigorako olioa herrira heldu zenean, saria entregatu genion Pedro Miguel Martinezi, neguko lehiaketaren irabazleari. Gogoratu laster izango dugula parte hartzeko aukera, udaberriko lehiaketan maiatzaren zortzitik aurrera, eskerrik asko guztiei parte hartzearren!

Busturialdeko Hitzan irakurri...+

Opor aurreko topaketa

Asteon oporrak eta azkena elkarrekin hartzeko geratu gara ostegun arratsaldean, 19:30ean lameran. Gonbidapen zabala da eta aprobetxatuko dugu neguko lehiaketaren saria banatzeko, Errigorako olioa. Gogoratu Errigorako kanpainaren produktuak gaur zortzietatik aurrera eta ostegunean ordu berean jaso daitezkeela euskal gunean. Oporretan ere #praktikatuetabizi.