Udazkeneko lehiaketa: irabazlea eta erantzun zuzenak

Atzo entregatu genuen Errigorako otzara, 132 erantzun artean zozketatu genuen eta Mariasun Lartitegiri tokatu zitzaion, zorionak Mariasun eta eskerrik asko guztiei parte hartzearren!
Honako hauek izan ziren erantzun zuzenak:
1. Lotu:
           1. Ogi gogorrari, hagin zorrotz
           2. Nekeetan, irria ezpainetan
           3. Astoak mandoari, belarri handi
           4. Zozoak beleari, ipurbeltz
           5. Ezina, ekinez egina
           6. Non gogoa, han zangoa
           7. Gogoko lekuan, aldaparik ez

2. Zein da Errigorako otzara eskatzeko azken eguna?  Azaroaren 20a
3. Non zegoen Floraren denda? Taraskan
4. Noiz izango da hurrengo Euskaraldia?  2020ko azaroan.
Hurrengo lehiaketa otsailaren 10etik 28ra izango da, neguko lehiaketa. Ez ahaztu, praktikatu eta bizi!

Errigorako otzarak ailega dira!

Heldu dira azaroan eskatutako Errigorako otzarak euskal gunera eta batzeko ordutegia da:
Bihar - 18:00-19:00
Etzi - 19:45 - 20:45

Pasatu mesedez bihar edo etzi jasotzera eta gogoratu webgunearen bitartez eskatu zenutenean ez bazenuten ordaindu, hartzeko momentuan ordaindu behar duzuela.

Berbalagunon amaierako topaketa

Asteon elkartuko dira berbalagunak urteari agur esateko ostiralean arratsaldeko 17:00etan lameran, azken bueltatxoa emateko eta zerbait elkarrekin hartzeko urtarrilaren 7ra arte, talde guztiak berriro abiatu arte. Topaketa honetara etortzeko gonbidapen zabala luzatzen dizuegu, talderen bateko partaidea izan ala ez, animatu eta etorri gurekin praktikatzera eta euskaraz bizitzera.

Magia tailerraren kronika

Pasa den asteko ostiralean gurasolagunak elkartu ziren euskal gunean Urtxintxako Ibon magoarekin arratsaldeko 18:00etatik 19:30era arte magia euskaraz egiteko. Gurasoek eta seme-alabek elkarri lagunduz, azalduz eta oso ondo pasatuz truko asko praktikatu zituzten, euskal gune osoan entzuten ziren haien txalo zaparradak truko bakoitzaren amaieran. Harrituta egon ziren guztiak azken trukoa eta gero, oparitxoak banatu ziren eta taldeko erretratua atera zuten Ibonekin. Seguru Gabonetan familiako beste guztiei egingo dietela trukoren bat....eskerrik asko Ibon!!

Argazki gehiago...+

2020an Kirola eta Natura

🌳🌲KIROLA eta NATURA programaren 2020ko eskaintza prest daukagu. Ekimen honen bitartez AEKren Praktikatu zerbitzuak gonbidatzen gaitu Euskal Herriko txokorik ederrenak euskaraz ezagutzera. Bi proposamen ditugu: Asteburuetako txangoak eta Udako ibiltariak.
Izena emateko > https://bit.ly/381ssd1 , doan!

Esan zuen lagun guztiei zuekin etortzeko, praktikatu eta bizi!

Gabonetako eskulan tailerra

Pasa den ostiralean Gabonetako apaingarriak egiteko elkartu ziren berbalagunak eta oso eskulan ezberdin eta dirdiratsuak egin zituzten Montseren laguntzarekin. Arratsalde ona pasatu zuten, seietatik bederatzi eta erdietara arte eta eskulana amaitu zuten oso giro onean. Besteren bat egiteko gogoz amaitu zen tailerra, seguru jarraipena izango duela, praktikatzeko eta euskaraz bizitzeko!

Abenduko agenda

Abenduan hainbat hitzordu interesgarri daude agendan apuntatzeko: gaurko hitzaldia, biharko aurkezpena, tailerrak, gure urte amaierako topaketa... etorri guztietara, praktikatu eta euskaraz bizi!

Gonbidapena: Arnasa gara

Taldekideei eman diegu Arnasa gara aurkezpenera joateko gonbidapena: abenduaren 3an, datorren asteko asteartean (nazioarteko euskararen egunean), arratsaldeko 18:30ean Kafe Antzokian. Hala eta guztiz, gonbidapena bera eraman barik ere joan zaitezkete, animatu ingurukoak zuekin joatera. Informazio gehiago...+

Beste aldetik, larunbat goizeko ekitaldian lagundu nahi baduzue, etorri goiko plazara goizeko 10:00etan, animatu, praktikatu eta bizi!

Aste honetako taldeak

Irudian agertzen dira astero elkartzen diren taldeak, baina besteren bat sor daiteke hiru edo lau lagun elkartzen zaretenean. Izena emateko deitu edo idatzi 607 609 580 telefonora eta hasi nahi duzuenean talderen batean. Aste honetan amaituko dugu izenak jasotzen, urtarrilera arte. Beraz, zuen taldekideren baten fitxa falta bada, jakinarazi mesedez, gogoratu doan dela baina fitxa bete behar dugula, ostiralerako beranduenez. Animatu zuen klasekideak, lagunak, familiakoak... praktikatu eta bizi!

Euskaraz bizi

2020an izango da hurrengo ariketa soziala euskaraz bizitzeko, Euskaraldia, eta bitartean pasa den urteko galdeketen emaitzak eta balorazioa gaur arratsaldean aurkeztuko dira Kultura Etxeko hirugarren solairuan, hitzaldi aretoan arratsaldeko zazpietan, animatu eta etorri berba egitera.

Beste aldetik, goiz osoko egitaraua prestatu da nazioarteko euskararen eguna ospatzeko, azaroaren 30ean goiko plazan, goizeko bederatzi eta erdietan mendi martxa laburrarekin hasita eta goizaren amaieran guztion argazki erraldoiarekin amaituta, apuntatu data eta etorri ondo pasatzera: jolasak, talo tailerra, ergometroa, pailazoa, dantzak...

Amaitzeko, Hizkuntza Eskolan Eneko Sagardoy egongo da abenduaren bian, arratsaldeko bostetan Izaro gelan, berbalagun guztiok gonbidatuta gaude.
Etorri, parte hartu, praktikatu eta euskaraz bizi!

Gurasolagunentzako magia tailerra

Urtxintxak dinamizatutako tailerra izango dugu abenduaren 13an, arratsaldeko seietatik aurrera euskal gunean (Atalde 17, atzealdea), magia egiteko. Gurasoak seme-alabekin batera arituko dira magia egiten, doan, ondo pasatzeko eta euskaraz hitz egiteko. Zazpi urtetik gorako umeentzat izango da aproposa, beti ere gurasoekin batera, eta gogoratu betiko moduan plaza kopurua mugatua dela.
Izena emateko mezua idatzi whatsappez edo e-postaz (607 609 580 / bermeoberba@gmail.com), zuen izen-abizenak jakinarazteko, baita umeen adina ere. Izena emateko azken eguna abenduaren 9a izango da. Trukoen sekretua gorde, gero Gabonetan familiakoak harrituta uzteko. Familian ere, praktikatu eta bizi!

Eskulan tailerra

Azaroaren 29an eskulan tailerra izango dugu euskal gunean arratsaldeko seietatik aurrera. Montse Alonsoren laguntzaz Gabonetako apaingarria egingo dugu eta materiala erosteko 3€ jarriko dugu bakoitzak. Egun horretan ez badugu amaitzen, taldea osatuko dugu eta erabakiko dugu zein den egunik aproposena eskulanak egiten jarraitzeko.
Eman izena hilaren 22a baino lehen (607 609 580), praktikatu eta bizi!

Udazkeneko lehiaketa

 

Gaurtik 29ra udazkeneko lehiaketan parte hartzera gonbidatzen zaituztegu eta jasotako erantzun guztien artean Errigorako otzara zozketatuko dugu.
Lau galdera errazak dira, beheko formularioan erantzun dezakezue edota eskuorritxoa bete. Azken aukera hau nahiago baduzue, entregatu jaso duzuen leku berean: Kulturetxean, liburutegian, euskaltegian, Hizkuntza Eskolan... edo berbalagun taldekideen bitartez. 29tik aurrera argitaratuko ditugu erantzun zuzenak eta irabazlearen izen abizenak. Ez ahaztu kontakturako telefono zenbakia edota e-posta helbidea idazten.

Orritxoen aurrealdean berbalagun talde, ekintza eta hitzorduen gaineko informazioa daukazue: gurasolagunen magia tailerra abenduaren 13an, berbalagunkideen topaketa urtea agurtzeko abenduaren 20an eta mendi irteera urtarrilaren 26an Delikara. Informazio gehiago nahi izatekotan, deitu edo bota mezua 607 609 580 zenbakira. Animatu eta parte hartu!

Errigorako otzara eskatu azaroaren 20ra arte

Azaroaren 20ra arte izango da Nafar hegoaldeko uzta euskarari puzka kanpainaren 2019ko edizioa. Urtero bezala, Nafarroa hegoaldeko produktu bikainez osatutako otzarak eskatu ahal izango dira. Aurten gainera, eskaintza berrituarekin datoz: ez bat, ez bi; 3 izango dira aukeran: beltza (klasikoa), berdea (ekologikoa) eta zuria (berezia).
Saski hauek erostean, hartu ez ezik, eman ere egingo duzue. Izan ere, saskiek dakartzaten produktuez gozatzeaz gain bertako ekoizpenari bultzada emango diozue, eta bestetik, saski bakoitzaren balioaren %25 Nafarroa erdi eta hegoaldeko eta erdialdeko euskalgintzari emango diozue.

Informazioa eta eskaerak  + (Klikatu) 

Azaroko berbalagun taldeak

Asteon hasiko da talde berria lameran, arratsaldeko bostak eta laurdenetatik aurrera, astearteetan. Badakizue izena eman ahal duzuela edozein momentutan talderen batera etortzeko, etorri praktikatzera!
Taulan ikusten duzuen moduan egunero egongo da talderen bat aukeran, hiru talde goizez eta beste hiru arratsaldez, egun eta ordu ezberdinetan. Hala eta guztiz, ez dago arazorik beste talderen bat eratzeko, hiru edo lau lagun elkartzen bazarete hitzordua finkatzeko. Animatu, praktikatu eta bizi!

Azaroko agenda

Azaroan udazkeneko lehiaketan parte hartu ahal izango duzue, Errigorako otzara eskuratzeko, 11tik 29ra. Agendan azpimarratu ditugun hitzorduetan berbalagunak aurkituko dituzue, azaroan ere, praktikatu eta bizi!

Gurasolagunen eskulanak

Pasa den ostiralean gurasolagunak elkartu ziren eskulanak egiteko eta euskaraz aritzeko, helduak eta umeak elkarrekin. Mirenek azaldutakoari ekin zioten arratsaldeko seietatik aurrera eta berriro etorriko direla hurrengo batean esan ziguten amaieran, zortzietako bueltan. Eskerrik asko Miren!

Eman izena, praktikatu eta bizi

Eman izena Bermeoko berbalagunekin euskara praktikatzeko eta euskaraz bizitzeko aukera berriak topatzeko, doan da:  607 609 580  , bermeoberba@gmail.com.
Ez utzi geroko!

Gurasolagun: familian euskaraz

Gurasolagunen tailerretan elkartuko dira gurasoak eta seme-alabak elkarrekin euskaraz jolasteko. Urriaren 18an arratsaldeko seietan geratuko dira Euskal Guneko gelan (Atalde, 17) eskulanak egiteko: giltzatakoak eta beste apaingarri batzuk aukeran. Materiala gure kontu, ez duzue ezer ekarri behar, eskulanetarako gogoa baino ez. Materiala tailerrean bertan ordainduko da, hiru euro familiako.
Plaza kopurua mugatua da eta izena emateko bidali whatsappa 607 609 580 zenbakira gurasoaren izena eta umeen adina zehaztuz. Tailerra arratsaldeko seietan hasiko da, puntualak izan mesedez eta gogoratu, familian ere praktikatu eta bizi!

Asteburu honetan ere zinea euskaraz

Asteburu honetan berriro izango dugu aukera "Agur, Etxebeste!" ikusteko Nestor Basterretxea aretoan eta gonbidapen bi zozketatuko ditugu zuetariko bat nahi duenarekin zinera joateko. 

Honako hauek izango dira ordutegiak:

Zapatuan: 19:30-22:00

Domekan: 19:30

Astelehenean: 19:00-21:30

 

Zozketan parte hartu nahi baduzue, mezua bidali 607 609 580 zenbakira. Zorte on, praktikatu eta bizi!

Urriko agenda eta taldeak

Urrian aukera asko egongo dira Bermeon euskaraz bizitzeko eta guk interesgarrienak ekarri ditugu agendara, asteroko taldeekin batera. Praktikatu eta bizi!

Asteburuan zinea euskaraz

Datorren asteburuan "Agur Etxebeste" pelikula izango dugu Nestor Basterretxea aretoan eta sei gonbidapen dauzkagu zuentzat. Gonbidapena leihatilan erakutsi eta sarrera eskuratuko duzue irailaren 28, 29 edo 30ean, nahiago duzuen egunean.
Zuen izan abizenak helarazi berbalaguneko 607 609 580 telefono zenbakira eta ostegun arratsaldean zozkatuko ditugu interesdun guztien artean. Zinean ere praktikatu eta bizi!

Euskaraz irakurtzeko: Irkurleen Txokoa

Irakurtzea gustatzen zaizu baina ez dakizu zer irakurri euskaraz? Eman izena Irakurleen Txokoan eta hasi euskaraz irakurtzen. Hilabetero elkartuko da taldea irakurritakoa komentatzeko dinamizatzaile baten laguntzaz, Arrate Egañarekin hain zuzen.
Lehenengo saioa urriaren 17an izango da eta izena eman behar da Euskera Sailean (Kulturetxeko bigarren solairuan) edo udal liburutegian, doan. Saio bakoitzean eskuratuko duzue irakurriko duzuen hurrengo liburua, irakurriz ere praktikatu eta bizi!

Informazio gehiago...+

Agur, Xixili!

Atzo gauean agurtu genuen Xixili eta hasi gara eguneroko zereginetan berriro, eman izena eta etorri berbalagun talde batera!
Ostiral arratsaldean elkartuko da lehenengo taldea, arratsaldeko bostetan lameran, eta datorren astean zehar beste talde batzuk hasiko dira.

Informazioa, zalantzak argitzea, edozer behar baduzue deitu edo bidali mezua 607 609 580 zenbakira. E-postaz nahiago baduzue, idatzi bermeoberba@gmail.com helbidera eta hasi euskaraz hitz egiten, praktikatu eta bizi!

Oporretan ere praktikatu eta bizi

Irailaren 12tik aurrera hasiko dira berriro asteroko taldeak, ordura arte praktikatu eta bizi oporretan ere!

Euskara ibiltaria, erakusketa Arrantzaleen museoan

Bermeoko Arrantzaleen museoan 'Euskara ibiltaria' erakusketa izango da ekainaren 20tik irailaren 17ra.  'Euskara ibiltaria' Euskararen Herri Hizkeren Atlasa lanean oinarritutako erakusketa bat da eta bere helburu nagusia da euskarak alor desberdinetan bere lurralde osoan hartzen dituen formak eta aldaketak modu berezi batean erakustea. Bisitariek zentzumenak baliatuko dituzte erakusketaren berri izateko: usaindu, entzun eta ikutzeko erakusketa da.

'Euskal ibiltaria' erakusketa Euskaltzaindiak, Arrantzaleen museoak, Bizkaiko Foru Aldundiak, Laboral Kutxak eta Bermeoko Udalak antolatu dute. 

Ekainaren 20an, ostegunean, hasiera-ekitaldia izango da, arratsaldeko 19:00etan, Bermeoko Arrantzaleen Museoan. 

Etorri, parte hartu, praktikatu eta bizi!

Udaberriko lehiaketa: erantzunak eta irabazlea

Pasa den astean dantza errazak praktikatzeko taldeak amaitu zuen aurtengo jarduna, hurrengoan berriro elkartzekotan praktikatzen jarraitzeko. Hartu zuten azkena elkarrekin eta zozkatu zuten Errigorako saria lehiaketako 103 partaideen artean. Irabazlea Ane Rayo izan da, zorionak Ane!

Eskerrik asko guztiei parte hartzearren, udazkenean espero zaituztegu berriro. Erantzun zuzenak izan dira:
1.   Lotu:

1.   Katurik ez dagoen etxean, saguak dantzan.

2.   Horrek otzara askotan ditu sagarrak.

3.   Honek babak eltzetik aterako dizkigu.

4.   Urrea esan eta urria eman.

5.   Isilik dagoenak ez dio gezurrik.

6.   Goiz gorri, arrats euri.

7.   Gaizki esanak barkatu, ondo esanak gogoan hartu.

2.   Zenbat urte bete ditu aurten Bermeoko Arrain Azokak?   25 urte   
3.   Zein idazle gonbidatuko du aurten Bermeoko irakurle txokoak? Zein liburu izango dute solasgai?  Ekaitz Goienetxea, “Zaldi mamarroa”                          
4.   Zer eskatzen dute Bermeoko arrantzaleek Gaztelugatxen?  Arraina, eguraldi ona eta osasuna        

Udako taldea astearteetan Talan

Aste honetan hasiko da uda eta udan elkartzeko talde berria sortu da astearteetan, Talan, 19:30tik 21:00etara, euskaraz praktikatzeko eta gustura egoteko lagunartean. Dagoeneko eman duzue izena bederatzi lagunek baina badakizue ez dagoela arazorik egun solteetan hurbiltzeko eta berbalagunak ezagutzeko.
Beraz, uztailaren 2an geratuko zarete lehenengo egunez eta taldea elkartuko da honako egun hauetan:
- Uztailaren 2an, 9an, 16an, 23an eta 30ean.
- Abuztuaren 6an, 13an, 20an eta 27an azken egunez.
Irailaren amaieran hasiko dira elkartzen asteroko taldeak, eman izena eta irailaren 13tik aurrera deituko dizuegu eguna eta ordua konkretatzeko, euskaraz praktikatu eta bizi!

Uda aurreko topaketa: bazkaria

Pasa den ostiralean berbalagun taldetakook elkarrekin bazkaldu genuen elkar agurtzeko uda pasa arte. Oso aukera ona izan da taldekideak ezagutzeko, nahiz eta urte osoan astero elkartu, beste talderen batean elkartzen direnak askotan ez baititugu ezagutzen izan. Bazkaldu eta gero portuan eman genuen arratsaldea eta iluntzera arte talan amaitu genuen eguna.

Gogoratu udan talde bat gutxienez mantenduko dela, seguruenik astearte arratsaldeetan, 19:30etik aurrera talan. Izena emateko epea ekainaren 14an amaituko da, etorri, praktikatu eta bizi!

Ekaineko agenda

Ekainean ekintza asko egongo dira aukeran Bermeon euskaraz bizitzeko eta agendan azpimarratu ditugu haietariko batzuk:

Kirola eta Natura ekainean

Hile honetan azken bi irteerak izango dira, ekainaren bederatzian Urkiolara eta 23an Itxinara. Aurreko guztietan bezala, goizekoak izango dira, 9:00etatik aurrera, lagunartean mendiaz gozatzeko, leku berriak ezagutzeko eta euskaraz bizitzeko, praktikatu eta bizi!

Larunbatean Bakiora Gernika-Lumoko berbalagunekin

Larunbat honetan, maiatzaren 25ean, aukera izango dugu Gernika-Lumoko berbalagunekin batera Bakiora joateko oinez. Eguerdirako bueltatuko dira autobusez, beraz, aurreko guztietan bezala, izena ematea ezinbestekoa da.

Informazio gehiago: +

Animatu, parte hartu, praktikatu eta bizi!

Urduñako topaketa, merkaturako bisita eta dastaketa

Ekainaren 1ean, Urduñako merkatuan, GURE HIZKUNTZA, GURE ELIKADURA, GURE MUNDUA topaketaren hirugarren edizioa antolatu dugu VSF-Bidezko Elikadura elkarteak eta AEKren Praktikatu zerbitzuak, Urduñako udaletxearen laguntzarekin.

Aurten Urduñako sukalde proiektua ezagutuko dugu, hilero antolatzen den merkatu agroekologikoa bisitatuko dugu eta tokiko elikagaiak dastatuko ditugu. Ordutegia: 10:00etatik 16:00etara.

Familian bazatozte izen-emate kolektiboa egin > https://bit.ly/2Hj93sO Bestela banakoa bete > https://bit.ly/2Q6h8Uu

Izena emateko azken eguna: maiatzaren 26a.

Bestelako informaziorik nahi izanez gero, idatzi mesedez proiektuak@justiciaalimentaria.org helbidera edo deitu 94 496 11 75 / 640 651 468 zenbakira.

Animatu, etorri, parte hartu, praktikatu eta bizi!

Udaberriko lehiaketa, datozenak, taldeak eta egindakoak

Urtero moduan, argitaratu dugu udaberriko informazioa eta lehiaketa, hile honetako 31 baino lehen erantzuteko eta Errigorako produktuen lote osoa irabazteko aukera izateko. Ekainaren hasieran jakinaraziko dizuegu nor den irabazlea eta zeintzuk izan diren erantzun zuzenak, animatu, elkarbanatu (KLika), zabaldu, praktikatu eta bizi!

Opor aurreko topaketa

Maiatzaren 31n opor aurreko topaketa izango dugu, talde guztietako partaideak elkartzeko udako etenaldia egin aurretik. Eguerdiko ordu bat eta erdietan geratuko gara lameran, Izaro aurrean, eta bazkaltzera joango gara. Animatu eta etorri, ezin bazarete etorri bazkaltzera, bazkalondoko tertuliara, elkar agurtzeko. Ekainean talde batzuk mantenduko dira, beste batzuk ez, talde bakoitzak erabakitakoaren arabera.

Eman izena udako berbalagun taldean

Ez duzuela lortu astean zehar ordubete ateratzea berbalagun taldera etortzeko? 
Udan lasaiago ibiliko zarete eta iluntzean elkartuko gara astero berba egiteko, baina izena ematea beharrezkoa da, taldeak aurreikusteko. Izan daitezke orain arteko taldeetako egun eta ordutegiak, edo beste hitzorduren batean adostuko dugu geratzea.
Beraz, parte hartu nahi duzuela adierazi zuen bidelagunei, dinamizatzaileari, irakasleei.. edota Euskera Sailean (Kulturetxeko bigarren solairuan). Informazioa, zalantzak argitzeko, proposamenak egiteko, deitu edo mezua bidali 607 609 580 telefonora eta deituko dizuegu.
Udan parte hartzeko ez da zertan arinago berbalagun talderen batean egon, izan daiteke lehenengo aldiz zatoztela, ez dago arazorik. Hori bai, izena eman behar da ekainaren 14a baino lehen. Data horretatik aurrera ez da sortuko talderik eta aukera bakarra daudenetan parte hartzea izango da, udako taldean bertan bidelagunari adierazita. Dohainik da baina inskripzioa bete behar da:  https://bit.ly/2JqaiYN
Udan ere praktikatu eta bizi!

Eskerrik asko!

Eskerrik asko egindako balorazioengatik, ezinbestekoak dira gure lana hobetzeko eta zuen beharrizanetara egokitzeko. Gero eta gehiagotan jasotzen ditugu zuen balorazioak formularioaren bitartez eta honek errazten du prozesua, mila esker!
Badakizue urtero eskatzen dizuegula zuen iritzia sasoi honetan baina eskertzen dizuegu edozein momentutan zuen iritzia ematea. Momentuz oso balorazio ona egin duzue, pozten gara!

Amaierako bazkaria 2019

 

Ikasturte honetako azken asteak helduko dira berez eta amaierako bazkaria antolatzen hasi gara. Gero eta berbalagun gehiago garenez, galdetu nahi dizuegu noiz eta non egin nahi duzuen, guztion artean erabakitzeko. Erantzunen artean ez badago zuen gustukorik, gehitu beste bat eta komentatuko dugu. Bestela, emandako erantzunen artean aukeratuena hartuko dugu kontuan. 
Bazkarira etorriko bazarete edozein egun eta lekutan, zuen izena eman eta apuntatuta egongo zarete, nahiz eta aukerarik ez markatu. Gonbidatu zuen lagunak, ezagunak, bikotekideak... euskaraz gurekin bazkaltzeko eta mesedez abisatu menu berezirik behar duzuen.

 Eta ekainetik aurrera, zer?

Urtero mantentzen da talde bat udan, orain arte iluntzean. Nahi baduzue, oharretan aipatu udan elkartuko zareten edo ez eta zein den zuen egunik edo ordutegirik gogokoena. Blog honetan bertan emango dugu zuen erantzun guztien berri, mila esker!

Maiatzeko agenda

Maiatzean herriko arrain azoka ospatzeaz gain hainbat irteera, tailer eta hitzaldi egongo dira Bermeon euskaraz praktikatzeko eta bizitzeko, asteroko taldeak barne. Agenda gorde!

Errigorako olioa batu astelehenean

Errigorako olioa batzeko eguna astelehena izango da, apirilaren 15a, euskal gunean, 19:00etatik aurrera. Ezin bazarete pasa astelehenean, abisatu mesedez eta geratuko gara.

Gogoratu apirilaren 29an hasiko direla berriro berbalagun talde guztiak eta gaur arratsaldeko bostetan lameran geratu garela elkar agurtzeko. 

Aste biko etenaldi honetan jarraitu ohiturak aldatzen, praktikatu eta bizi!

Bazatoz antzerkira?

Lau gonbidapen dauzkagu etzi Mami Lebrun antzezlana ikustera joateko, Nestor Basterretxea aretoan arratsaldeko zortzietan.

Interesdun guztien artean zozketatuko ditugu gaur arratsaldeko seietan, eman izena (607 609 580) eta antzerkira joan, praktikatu eta bizi!

Kirola eta natura maiatzaren 12an: Entzia mendilerroa

Hurrengo irteera maiatzaren 12an izango da, izena emateko klika + hemen maiatzaren 9a biano lehen. Ibilaldiaz gain, Cristinoseko kobazuloa eta bertako lakua bisitatuko dugu. Eman izena, praktikatu eta bizi!

Gurasolagun tailerra: jolas kooperatiboak

Maiatzaren 10ean, arratsaldeko sei eta erdietan, jolas kooperatiboak antolatu ditugu Urtxintxarekin batera euskal gunean (Atalde 17, behea). Izena emateko familiako heldu eta umeen izenak eman behar dituzue, elkarrekin jolasteko. Azken eguna izena emateko maiatzaren 8a izango da. Bai izena emateko, baita zalantzak argitzeko, idatzi edo deitu 607 609 580 telefonora. Familian ere praktikatu eta bizi!

Maiatzean talde berria hasiko da

Dantza errazak praktikatzeko elkartuko da aurten berriro taldea, iazko eguna mantenduz: asteazkenero arratsaldeko zazpietatik aurrera Kluturetxeko lehenengo solairuko 1.4 gelan. Talde honetan parte hartzeko eman izena 607 609 580 telefonoan edo aurrez aurre eman lehenengo egunean, maiatzaren 8an bertan. Printzipioz azken eguna maiatzaren 29a izango da baina talde guztietan gertatzen den bezala, taldekideek eurek erabakiko dute jarraitu ala ez. Dantzan ere praktikatu eta bizi!

Zinerako gonbidapenak: Soinujolearen semea

Soinujolearen semea 14 urtetik gorakoentzako pelikula euskeraz egongo da asteburuan, apirilaren 13, 14 eta 15ean Bermeoko Nestor Basterretxea Aretoan, eta zuentzako 6 gonbidapen dauzkagu. Sarrerak leihatilan hartu behar dituzue gonbidapenen truke,  han egongo baitira zuen izenean. 

Interesdun guztien artean zozketatuko ditugu sei gonbidapen bihar arratsaldean eta zozketako zerrendan egoteko zuen izen abizenak helarazi baino ez duzue egin behar: 607 609 580, bermeoberba@gmail.com.

Ondo pasa, praktikatu eta bizi!